विठाचे अभंग - तंव धांउनी गेला चरणीं लाग...

तंव धांउनी गेला चरणीं लागला । देवा तूं दाखविला ठेवा माझ्या मायबापाचा ॥१॥
जाऊन तो धरीन न सोडीं मी आतां । जे मज पंढरिनाथा ग्वाही दिधली ॥२॥
तंव खेचरु तेथें स्नानसंध्या करी । तंव ओढोनी पाय धरी विठा नामयाचा ॥३॥
तंव तो अवचिता खडबडोनी भ्याला । कोठोनी घाला पडिला धाडी मजवरी ॥४॥
उठी परता तूं कोणाचारे काय । ठाईं ठाईं राहें हालूं नको ॥५॥
तुझिया वडिलासी जाब देईन । धरोनी नेईन हें पोर कोणाचें ॥६॥
लाडिकें लडिवाळ आपुलें बा धांवे पायीं । तुज कोणी नाहीं मग तूं निलाजिरे ॥७॥
छंद ना बंद झोबतोसी धीटा । बांधेन चोहटा चौघाचारी ॥८॥
फजीत करतील तुज कीं मज जाण । खेचर विसोबा म्हणती जा तुज विठोबाची आण ॥९॥