अभंग - नित्य मातृतीर्थी स्नान

नित्य मातृतीर्थी स्नान । नित्य रेणुकादर्शन ॥१॥
आदिमाये तुजपाशी । सर्व देव तीर्थें काशी ॥२॥
उजळोनी ज्ञानज्योती । नित्य ओवाळूं आरती ॥३॥
करुं तीर्थामृतपान । हेंचि जप तप ध्यान ॥४॥
करुं त्रिकाळ वंदन । तोडूं यमाचें बंधन ॥५॥
करुं नित्य प्रदक्षिणा । तन मन धन दक्षिणा ॥६॥
तुझ्या बैसोनी द्वारांत । गुण गाऊं दिन रात ॥७॥
नित्य पाहूं तुझें मूख । हेंचि आम्हां ब्रह्मसुख ॥८॥
नित्य विष्णुदास म्हणे । कृपा लोभ असूं देणें ॥९॥