एवढासा तांदूळ बाई नखांनी खुडीला
भारा जी बांधिला बाई येशीभाईर टाकीला
गाय आली हुंगून गेली
म्हैस आली खाऊन गेली
म्हशीला झाला बाई रेडा
गाईला झाला बाई पाडा
तोच रेडापाडा बाई बापाजींचा वाडा
बापाजींनी घेतली जांभळी घोडी
जांभळ्या घोडीची नेटकी चाल.
जिथं पाऊल पडलं तिथं कोलापुरी शाल
कोलापुरी शाल बाई उंदरून दिशी
ठसा पडल बाई चोळीचोळी देशीं
ठस्सा मस्सा अंबर घस्सा
अंबरांत पडली काडी
तीच काडी उप्पर माडी
उप्पर माडीवर कमळाचं तळं
त्या बाई तळ्यांत परटीन धूती
विठूच्या टोपीला निळा रंगदेती
विठूची टोपी बाई रंगाची
रखमाईची चोळी भिंगाची