नाहीं पाहिलें पारखें महेश्वर क्षेत्रपुर ॥धृ०॥
नर्मदा निकट तट घाट । बहुत अफाट । पायर्या दाट । चिरे वाट । मुक्तीचीं शिवालयें ।
कैलास साम्यता नानापरिची रचना रचिली । रामकृष्ण मंदिर । बहुत सुंदरें । बांधिलीं घरें ।
रमे रमणूक हवेल्या । नयनीं पाहिल्या । नूतन थाट । प्रताप अहिल्या । किल्यावर तळवटी ।
शहर गुलजार । बहुत बाजार हारज । दुकानें लक्षापति सावकार ।
भारी भारी माल खजीना रस्ता खस्ता सुकाळ नाहीं दुष्काळ बाल वृद्ध प्रतिपाल करीती ।
गरिब गुरिब कंगाल गांजले । अडले भिडले । त्या देखुनियां अन्नछत्र सरी सारखे ।
नाहिं पाहिलें नयानें पारखे । महेश्वर क्षेत्र पूर ॥१॥
दानधर्म करी नित्य शिवार्चन । सत्वशील ऐकुनी धांवती । देशोदेशींचे कर्नाटक । तैलंग द्रावीड ।
वर्हाड कर्हाड । कोल्हापूर, कृष्णातीर, गंगातीर । कोंकण काशीकर ।
गयावळ, माळवे बिरांगडे येती कावडे, वेडे बागडे । गुजराथी मैथुलीपुरी । भारती दिगंबर जटाधारी ।
बैरागी योगी कानफाडे दर्शना येती । हरिदासाचे प्रेमळ भक्त सांप्रदाय पुष्कळ पाहिले नयनीं । सर्व महेश्वर क्षेत्रपूर ॥२॥