आधीच मर्कट तशांतहि मद्य प्याला।

मराठी वाक्संप्रदाय - वाक्यप्रचार

‘आधीच मर्कट तशांतहि मद्य प्याला। झाला तशांत मग वृश्र्चिकदंश त्याला। झाली तयास तदनंतर भूतबाधा। चेष्टा वदूं मग किती कपिच्या अगाधा।।’ एखाद्या माकडाला जर प्रथम दारू पाजली व त्यांत त्याला आणखी विंचू चावला व नंतर त्यास भूतबाधा झाली तर तो किती खोड्या करील व कोणत्या प्रकारचा धिंगाणा घालील त्याचे वर्णनहि करतां येणें शक्य नाही. एखाद्या कुचेष्टेखोर अथवा खोड्याळ मनुष्याला जर अनुकूल संधि मिळाली तर त्याच्या चेष्टांस ऊत आल्याशिवाय राहात नाही. तु०-मर्कटस्य सुरापानं तस्य वृश्र्चिकदंशनम्। तन्मध्ये भूतसंचारो यद्धातद्वा भविष्यति।। -सुर १५९.२६८.