रुणुझुणु ये !
भा.रा.तांबे यांच्या कविता अत्यंत हळुवार असून त्या मनाला भिडतात
रुणुझुणु ये, रुणुझुणु ये झणकारित वाळा
लुटुलुटुलुटु दुडुदुडुदुडु ठुमकत ये बाळा ? ध्रु०
धुंदि अजुनि रजनिनयनिं;
सावरूनि पदर धरुनि
शुभवदना उडुरदना देइ जांभयांला. १
दिग्ललना धौतमुखी
रत्नदीप कनकतबकिं
घेउनिया बाहति या बालबास्कराला. २
काकड-आरति करिती
देवगृहीं नवयुवती;
आळविती जागविती नंद-नंदनाला. ३
रजनितनय मारुतगण
नृत्य करिति चपलचरण,
तोम् तननन झूम् झननन करिति गायनाला. ४
जागति बघ चिउकाऊ;
लागति घरट्यांत गाउं;
डोलति तरु, लगति करुं ते हरिभजनाला. ५
जागति गोठ्यांत गाइ,
पाजति वत्सांस पाहिं;
ये रांगें ! कळ लागे माझिया स्तनांला ! ६
N/A
कवी - भा. रा. तांबे
जाति - शुभवदना
ठिकाण - अजमेर
दिनांक - २४ जानेवारी १९२३
Last Updated : October 11, 2012
TOP