बहुप्रपञ्ची दुःखी च जायाविरहतापितः । सूर्याद्यैर्जीवपर्यन्तैर्नरः स्यात्पञ्चभिर्ग्रहैः ॥१॥
गतसत्यो बन्धुहीनः परकर्मरतो नरः । क्लीबस्य च सखा सूर्यभौमेन्दुबुधभार्गवैः ॥२॥
स्यादल्पायुश्च विकलो दुःखी सुतविवर्जितः । अर्कार्किबुधचन्द्रारयोगे बन्धनभागपि ॥३॥
जात्यन्धो बहुदुःखी च पितृमातृविवर्जितः । गानप्रीतो नरो भौमभानुचन्द्रेज्यभार्गवैः ॥४॥
परद्रव्यहरो योद्धा परतापकरः खलः । समर्थो जायते मन्दचन्द्रजीवार्कभूसुतैः ॥५॥
मानाचारधनैर्हीनः परदाररतो नरः । एकस्थैर्जायते भानुभौमेन्दुशनिभार्गवेः ॥६॥
राजमन्त्री भूरिवित्तो यन्त्रज्ञो दण्डनायकः । ख्यातो जने यशस्वी च जीवार्केन्दुज्ञभार्गवैः ॥७॥
परान्नभोजी सोन्मादः प्रियतप्तश्च वञ्चकः । उग्रो भीरुनरः सूर्यशनिचन्द्रेज्यचन्द्रजैः ॥८॥
धनपुत्रसुखैर्हीनो मृत्युत्साही च लोमशः । दीर्घो भवति चन्द्रार्कबुधशुक्रशनैश्चरैः ॥९॥
इन्द्रजालरतो वाग्ग्मी चलचितोऽङ्गनाप्रियः । प्राज्ञश्च दक्षो निर्भीतः शुक्रेज्यार्केन्दुसूर्यजैः ॥१०॥
स्फीतो बहुहयः कामी नरोऽशोकी चमूपतिः । बुधार्ककुजशुक्रेज्यैः सुभगो भूपतेः प्रियः ॥११॥
भिक्षाभोजी च रोगी च नित्योद्विग्नो मलीमसः । जीर्णो नरो भानुभौमशनिजीवबुधैर्भवेत् ॥१२॥
व्याधिभिः शत्रुभिर्ग्रस्तः स्थानभ्रष्टो बुभुक्षितः । नरः स्याद्विकलः शुक्रमन्दार्कबुधभूसुतैः ॥१३॥
विज्ञो विचारदेहे च धातुयन्त्ररसायनैः । नरः प्रसिद्धो भूपुत्ररविजीवसितासितैः ॥१४॥
मित्रप्रीतिः शास्त्रवेत्ता धार्मिको गुरुसंमतः । दयालुः शुक्रसूर्यार्किबुधजीवैर्जनो भवेत् ॥१५॥
साधुः कल्याणहीनश्च धनविद्यासुखान्वितः । बहुपुत्रो नरो जीवभौमेन्दुबुधभार्गवैः ॥१६॥
परान्नयाचको विप्रो मलिनस्तिमिरामयी । नरो भवति भौमेन्दुजीवशुकशनैश्चरैः ॥१७॥
दुर्भगो मलिनो मूर्खः प्रेष्यः क्लीबश्च निर्धनः । नरो भवति चन्द्रज्ञशुक्रसौरिमहीसुतैः ॥१८॥
बहुमित्रारिपक्षश्च दुःशीलः परपीडकः । मानी नरः सोमजीवशुक्रमन्दधरासुतैः ॥१९॥
राजमन्त्री राजतुल्यो लोकपूज्यो गुणाधिकः । चन्द्रचन्द्रजमन्देज्यभृगुपुत्रैर्नरो भवेत् ॥२०॥
अलसस्तामसो नित्यं सोन्मादो राजवल्लभः । निद्रातुरो नरो भौमबुधजीवार्किभार्गवैः ॥२१॥