द्वितीयप्रपाठकः - पञ्चमी दशतिः

इहेव शृण्व एषां कशा हस्तेषु यद्वदान् ।
नि यामं चित्रमृञ्जते ॥१३५॥
इम उ त्वा वि चक्षते सखाय इन्द्र सोमिनः ।
पुष्टावन्तो यथा पशुं ॥१३६॥
समस्य मन्यवे विशो विश्वा नमन्त कृष्टयः ।
समुद्रायेव सिन्धवः ॥१३७॥
देवानामिदवो महत्तदा वृणीमहे वयं ।
वृष्णामस्मभ्यमूतये ॥१३८॥
सोमानां स्वरणं कृणुहि ब्रह्मणस्पते ।
कक्षीवन्तं य औशिजः ॥१३९॥
बोधन्मना इदस्तु नो वृत्रहा भूर्यासुतिः ।
शृणोतु शक्र आशिषं ॥१४०॥
अद्य नो देव सवितः प्रजावत्सावीः सौभगं ।
परा दुःष्वप्न्यं सुव ॥१४१॥
क्वा३स्य वृषभो युवा तुविग्रीवो अनानतः ।
ब्रह्मा कस्तं सपर्यति ॥१४२॥
उपह्वरे गिरीणां सङ्गमे च नदीनां ।
धिया विप्रो अजायत ॥१४३॥
प्र सम्राजं चर्षणीनामिन्द्रं स्तोता नव्यं गीर्भिः ।
नरं नृषाहं मंहिष्ठं ॥१४४॥