राधिकां नौमि नीलाब्जमदमोचनलोचनाम् ।
श्रीनन्दनन्दनप्रेमवापीखेलन्मरालिकाम् ॥१९८॥
कुन्दकुञ्जममुं पश्य सरसीरुहलोचने ।
अमुना कुन्दकुञ्जेन सखि मे किं प्रयोजनम् ॥१९९॥
श्रीमत्कृष्णे मधुपुरगते निर्मला कापि बाला
गोपी नीलोत्पलनयनजां वारिधारां वहन्ती ।
म्लानिव्याप्ता शशधरनिभं धारयन्ती तदास्यं
गाढप्रीतिच्युतिकृतजरा निर्भरं कातराभूत ॥२००॥
वृन्दारण्यान्मधुपुरमिते माधवे तस्य पश्चा-
दायास्यामि त्वरितमितिवाग्बीजसम्भूतमेकम् ।
आशावृक्षं नयनसलिलैः सिञ्चती वर्द्धयन्ती
राधा बाधाविवशहृदया यापयामास मासान् ॥२०१॥
गोपीमात्रं घुणलिपिनयान्माधवप्रेमपात्रं
मत्वा यत्त्वामनतिशयिनी दृष्टिरग्रे ममासीत् ।
क्षन्तव्यं तद्विधिविधिसुतव्योमकेशाब्धिपुत्री-
मृग्यः पाशे पशुरिव तव प्रेम्णि बद्धो यदस्ति ॥२०२॥
धन्येयं धरणी ततोऽपि मथुरा तत्रापि वृन्दावनं
तत्रापि व्रजवासिनो युवतयस्तत्रापि गोपाङगनाः ।
तत्राचिन्त्यगुणैकधामपरमान्दात्मिका राधिका
लावण्याम्बुनिधिस्त्रिलोकरमणीचूडामणिः काचन ॥२०३॥
या पूर्वं हरिणा प्रयाणसमये संरोपिताशालता
साभृत् पल्लविता चिरात् कुसुमिता नेत्राम्बुसेकैः सदा ।
विज्ञातं फलितेति हन्त भवता तन्मूलमुन्मूलितं
रे रे माधवदूत जीवविहगः क्षीणः कमालम्बते ॥२०४॥
आनम्रायां मयि निजमुखालोकलक्ष्मीप्रसादं
खेदश्रेणीविरचितमनोलाघवायाविधेहि ।
सेवाभाग्ये यदपि न विभो योग्यता मे तथापि
स्मारं स्मारं तव करुणतापूरमेवं ब्रवीमि ॥२०५॥
असितावयवस्य या व्रजेन्दोः
सितशोभैव पृथक्कृतेव भाति ।
प्रणयातिशयेन तां नु राधां
भवबाधाविनिवृत्तये नमामः ॥२०६॥
संविधाय दशने तृणं विभो प्रार्थये व्रजमहेन्द्रनन्दन ।
अस्तु मोहन तवातिवल्लभा जन्मजन्मनि मदीश्वरी प्रिया ॥२०७॥
यो ब्रह्मरुद्रशुकनारदभीष्ममुख्यैरालक्षितो न सहसा पुरुषस्य तस्य ।
सद्योवशीकरणचूर्णमनन्तशक्तिं तं राधिकाचरणरेणुमनुस्मरामि ।
श्यामेति सुन्दरवरेति मनोहरेति
कन्दर्पकोटिललितेति सुनागरेति ।
सोत्कण्ठमह्नि गृणती मुहुराकुलाक्षी
सा राधिका मयि कदा नु भवेत्प्रसन्ना ॥२०९॥
कृष्णः पक्षो नवकुवलयं कृष्णसारस्तमालौ
नीलाम्भोदस्तव रुचिपदं नामरुपैश्च कृष्णा ।
कृष्णे कस्मात्तव विमुखता मोहनश्याममूर्ता-
वित्युक्त्वा त्वां प्रहसितमुखीं किन्नु पश्यामि राधे ॥२१०॥
ध्यायंस्तं शिखिपिच्छमौलिमनिशं तन्नाम सङकीर्तयन्
नित्यं तच्चरणाम्बुजं परिचरंस्तन्मन्त्रवर्यं जपन् ।
श्रीराधापददास्यमेव परमाभीष्टं हृदा धारयन्
कर्हि स्यां तदनुग्रहेण परमोद्भूतानुरागोत्सवः ॥२११॥
राधाकरावचितपल्लववल्लरीके राधापदाङकविलसन्मधुरस्थलीके ।
राधायशोमुखरमत्तखगावलीके राधाविहारविपिने रमतां मनो मे ॥२१२॥