मूर्तिभंजन

( अभंग )

मूर्ति फोडा, धावा !   धावा फोडा मूर्ति,
आंतील सम्पत्ति  फस्त करा !

व्यर्थ पूजाद्रव्यें   त्यांस वाहूनियां,
नाकें घांसूनीयां  काय लभ्य ?

डोंगरींचे आम्ही  द्वाड आडदांड,
आम्हांला ते चाड   संपत्तीची !

कोडें घालूनियां  बसली कैदाशीण,
उकलिल्यावीण  खाईल ती !

तिच्या खळीमध्यें  नाहीं आम्हां जाणें,
म्हणूनि करणें  खटाटोप.

मूर्ति फोडूनीयां  देऊं जोडूनीयां
परी विकूनीयां  टाकूं न त्या !

विकूनि टाकिती  तेचि हरामखोर
तेचि खरे चोर  आम्ही नव्हें !

१८९६