नवे पाखरू जा गबरुहि लवा ।
रंग हवा आणवा लाहान छिलवा ॥ध्रु०॥
हिरेखाण दिनमान तेज भाळी ॥
कटि कसुनिया चंद्र कळा काळी ॥
गोरा रंग खुषरंग ओठ पोवळी ॥
गेंद बुंद सुगंध कळी पिवळी ॥
चमकनोक नेत्राची आग जाळी ॥
विष पसरले भिन्नले जिव्हाळी ॥चाल॥
पाहुनि चित्त मन हे गार प्रियकरणी ॥
तु भला मारला वार प्रियकरणी ॥
पडदा अंतरिचा पार प्रियकरणी ॥
जणु बाड चीरिचा वार प्रियकरणी ॥
झालो होतो ठार दिला कलवा ॥१॥
नागुण जहरि डंकीली वर्मी ।
विषय उष्णता चढली आंगी गर्मी ॥
मुहूत केव्हा लागल भर्माभर्मी ।
टणकला जीव जाहला लइ शरमी ॥
भाग्यवंत कंठा वरते सुरभी ।
जशि सुगंधिक दवण्याची तुरमी ॥चाल॥
रंगिती बत्तीशी लाल प्रियकरणी ।
तरतरीत गोरे गाल प्रियकरणी ॥
चाले मस्त गजाची चाल प्रियकरणी ।
थरकावी नथनीचा लाल प्रियकरणी ॥
इचा पायि दौलत सारी डूलवा ॥२॥
रंग गुले नार वय द्वादश वरूषा ।
उरी उसासले गेंद लाहान गरसा ॥
नयन तडाके छातिमध्ये तिरसा ।
धिले गिरावुन सोपटले फरसा ॥
आग भडकली धमकी परपुरुषा ।
लावुनि गेल्या अपसामध्ये चुरसा ॥चाल॥
आज येउ पाहाती प्राण शरतीने ।
ही हिंडवील रानोरान युक्तिने ॥
घालुन गळ्याची आण अगतीने ।
जा भिडून छबिल्या जान जगतिने ॥
लालुच द्रव्याची दावुन भुलवा ॥३॥
शब्द गुणिचे मिठडे ऐकता ।
मान्य वचन हे आज एक मक्ता ।
लाच कशाला भरता खंड मक्ता ।
मुठि भरून पैसा मनमुक्ता ॥
चमकुन पठीया दे झोंक झुकता ।
बाहार लुटू दे जाईचा तक्ता ॥
चाल ॥ घ्या उत्तर आपले स्वस्त राहावे तुम्ही ।
वरकांती करता कष्ट रावहो तुम्ही ॥
विसराळ घराची गोष्ट राव तुम्ही ।
तृप्त व्हा जेउन मिष्टराव तुम्ही ॥
प्रिय उभयता ताजव्यात तोलवा ।
सगन भाऊ म्हणे चौपाळा हालना ॥
रंग हवा आणवा ।
लाहान छीलवा ॥४॥