धोंडो - (जांभई देत)
काम केव्हा सरे
गुंडो - (निःश्वास सोडून)
हाय! केव्हा ते सरेल?
वाटते, कंबर आताच मोडेल!
काय रे देवा ही आमुची स्थिती?
बरे आहे, चालू द्या! ना तरी मिळेल
येथून गचांडी ! छे, ते नको रे बाबा!
(अंगावर काटा आल्यासारखे करतो. इतक्यात शिपाई आणखी दोन फायली आणून ठेवतो.)
धोंडो - (स्फुंदत)
अंतच न देवा! का रे या फायलीलागून?
काम केव्हा सरे?
गुंडो (निःश्वास सोडून)
हाय! केव्हा ते सरेल?
धोंडो - (धीर करून)
बरे तर गुंडो, काढा एक विडी
गुंडो - (घाबरून)
छे, छे, नको रे राजसा असे तू करू!
धोंडो - (निश्चयाने)
काहीही म्हटले तुम्ही जरी आता
शिलगावतोच-
(विडी पेटवतो. तोच आतून साहेब येतो व धोंडोला विडी ओढताना पाहून त्याच्या पाठीत गुद्दा मारतो. धोंडो पळून जातो.)
धोंडो - (पळता पळता)
होऊ नये ते झाले!-
गुंडो - (स्वगत हसून)
व्हावे तेच झाले!
एकटाच विडी ओढतो लेकाचा!