भवनवाद्दनवृन्दपुराधिपः प्रचलनप्रियताविहितादरः ।
यदि च संजनने हि भवेत्कविः कवियुतो वियुतो रिपुभिर्नरः ॥१॥
बहुकलत्रसुतोत्सवगौरवं कुसुमगन्धरुचिः कृषिनिर्मितः ।
वृषगते भृगुजे कमला भवेदविरलाविरला रिपुमण्डली ॥२॥
भृगुसुते जनने मिथुने स्थिते सकलशास्त्रकलामलकौशलम् ।
सरलता ललिता किल भारती समधुरा मधुरान्नरुचिर्भवेत् ॥३॥
द्विजपते सदने भृगुनन्दने विमलकर्मप्रतिर्गुणसंयुतः ।
जनमलं सकल कुरुते वशं सकलया कलयापि गिरा नरः ॥४॥
हरिगते सुखैरिपुरोहिते युवतितो धनमानसुखानि च ।
निजजनव्यसनान्यपि मानवस्त्वहिततो हिततोषमनुव्रजेत् ॥५॥
भृगुसुते सति कन्यकयान्विते बहुधनं खलु तीर्थमनोरथः ।
कमलया पुरुषोऽपि विभूषितस्त्वमितया मितयापि गिरान्वितः ॥६॥
कुसुमवस्त्रविचित्रधनान्वितो बहुगमागमनो ननु मानवः ।
जननकालतुलाकलनं यदा सुकविना कविनायकतां व्रजेत् ॥७॥
कलहघातमतिं जननिन्द्यतां प्रजनतामयतां नियतां नृणाम् ।
व्यसनतां जननेऽलिसमाश्रितः कविरलं विरलं कुरुते धनम् ॥८॥
युवतिसूनुधनागमनोत्सवं सचिवतां नियतं शुभशीलताम् ।
धनुषि कार्मुकगः कविनन्दनः कविरतिं विरति कुरुते नृणाम् ॥९॥
अभिरतस्तु जराङ्गणया नृणां व्ययभयात्कृशतामतिचिन्तया ।
भृगुसुते मृगराशिगते सदा कविजने विजनेऽपि मतिर्भवेत् ॥१०॥
उशनसः कलशे जनुषि स्थितौ वसनभूषणभागविहीनतात् ।
विमलकर्ममहालसता नरैरुषगतापगतापि रमा भवेत् ॥११॥
भृगुसुते सति मीनसमन्विते नरपतेर्विभुता वितता भवेत् ।
रिपुसमाक्रमणद्रविणागमो वितरणे तरणे प्रणयो नृणाम् ॥१२॥