मेषे सुतस्थे लभते मनुष्यः प्रियेण पुत्रान्वितचेतसा च ।
सुरात्सुखानीह कृतानि चान्यात्पापानुरक्ताकुलचित्तयुक्ताः ॥१॥
वृषे सुतस्थे लभते मनुष्यः प्राप्नोति कन्यां सुभगां सुरुपाम् ।
अपत्यहीनां बहुकान्तियुक्तां सदानुरक्तां निजभर्तृधर्मे ॥२॥
तृतीयराशौ सुतगे मनुष्यः प्राप्नोत्यपत्यानि मनः सुखानि ।
सुशीलयुक्तानि गुणाधिकानि प्रीत्या समेतानि बलाधिकानि ॥३॥
कर्के सुतस्थे जनयेन्मनुष्यः पुत्रान्प्रसिद्धान्सुतलाभतश्च ।
विस्तीर्णकीर्तीश्च महानुभावान्धनेन युक्तान्विनयेन युक्तान् ॥४॥
सिंहे सुतस्थे जनयेन्मनुष्यः क्रूरस्वभावान्नयनेन कान्तान् ।
मांसप्रियान् स्त्रीजनकान् सुतीव्रान्विदेशभाजः क्षुधया समेतान् ॥५॥
कन्या यदा पञ्चमगा तदा स्युः कन्या नराणां तनयैर्विहीनाः ।
पतिप्रियाः पुण्यतराः प्रगल्भाः प्रशान्तपापाः प्रियभूषणाश्च ॥६॥
तुला यदा पञ्चमगा नराणां तदा सुशीलानि मनोहराणि ।
भवन्त्यपत्यानि सरुपकाणि क्रियासमेतानि शुभेक्षणानि ॥७॥
कीटे सुतस्थे जनयेन्न ( ? ) योनौ पुत्रान्मनुष्यः सुभगान्सुशीलान् ।
अज्ञातदोषान्प्रणयेन युक्तान्निजेऽत्र धर्मे सततं मनुष्यः ॥८॥
चापे सुतस्थे जनयेन्मनुष्यः सुतान्विचित्रान् हयलुब्धलक्षान् ।
धानुष्कचर्यान् हतशत्रुपक्षान् सेवाप्रियान्पार्थिवमानयुक्तान् ॥९॥
मृगे सुतस्थे जनयेन्मनुष्यः पुत्रान् सदा पापमतीन् कुरुपान् ।
क्लीबान् सुभावान्विगतप्रभावान् सुनिष्ठुरान्प्रेमविवर्जितांश्च ॥१०॥
कुंभे सुतस्थे स्थिरतासमेतान् गम्भीरचेष्टानतिसत्ययुक्तान् ।
पुत्रान्मनुष्यो जनयेत्प्रसिद्धान्कष्टंसहान्पुण्ययशः प्रभूतान् ॥११॥
मीने सुतस्थे ललितान् सुरक्तान् पुत्रान्मनुष्यो लभते व्यवायात् ।
रोगैः समेतांश्च सदाकुरुपान् सहास्यतान्स्त्रीसहितान् सदैव ॥१२॥