दशमपतौ लग्नगते मातरि वैरी पितुर्भक्तः ।
दुष्टगते च ताते खलु परपुरुषरता भवति माता ॥१॥
वित्तस्थे गगनपतौ मात्रा पालितः सुतो भवति लोभी ।
मातरि दुष्टो नितरां स्वल्पग्रासी श्रुतसुकर्मा ॥२॥
मातृस्वजनविरोधी सेवानिरतो न कर्मणि समर्थः ।
मातुलपरिपालितः स्याद्दशमपतौ सहजभवनस्थे ॥३॥
व्योमपतौ तुर्यगते सुखे विरतः सदाचारः ।
भक्तश्च पितरि मातरि नृपमानी जायते पुरुषः ॥४॥
शुभकर्मको विडम्बी नृपलाभी गीतवाद्यनिरतः स्यात् ।
गगनपतौ तनयगते पालयति च तं सुतं माता ॥५॥
अम्बरपे रिपुसंस्थे शत्रुभयात्कातरः कलहशीलः ।
कृपणः कृपया हीनो नरो न रोगी भवति लोके ॥६॥
सुतवती शुभरुपसमन्विता निजपतिप्रतिपालनलालसा ।
भवति तस्य शुभं कुरुते सदा प्रियतमाम्बरपे दयितागते ॥७॥
पुष्करपतिरष्टमगः क्रूरं शूरं मृषान्वितं दुष्टम् ।
मातरि संतापकरं जनयति तनुजीवितं कितवम् ॥८॥
शुभशीलः सद्वन्धुः सन्मित्रो दशमपे नवमलीने ।
तन्मातापि सुशीला सुकृतवती सत्यवचनरता ॥९॥
गगनपतिर्गगनगतो जननीसुखप्रदं पुरुषम् ।
जननीकुलविपुलसुखं प्रकथनघटनापटीयांसम् ॥१०॥
मानोर्जिते धनसहिता माता च रक्षणी भवेत्सुखिनी ।
दीर्घायुर्मातृसुखी पुरुषो लाभस्थितोऽम्बरपे ॥११॥
मात्रोज्झितो निजबलः शुभकर्मा नृपतिकर्मरतचेताः ।
व्योमपतौ व्ययसंस्थे देशान्तरगतश्च पापखगे ॥१२॥