अष्टमपतौ लग्नगते बहुविघ्नो दीर्घरोगभृत्स्तेनः ।
नेष्टानुवादनिरतो लक्ष्मीं लभते नृपतिवचसा ॥१॥
निधनपतौ धनलीनेऽल्पजीवी वैरिवान्नरश्च चौरः ।
क्रूरे सौम्येऽतिशुभं किमु क्षितिपालतो मरणम् ॥२॥
अष्टमपतौ तृतीये बन्धुविरोधी सुत्दृद्विरोधी च ।
व्यङ्गो दुर्वाग्लोलः सोदररहितो भवत्यथवा ॥३॥
निधनेशे तुर्यगते पितृरिपुः पितृतो नयेल्लक्ष्मीम् ।
पितृपुत्रयोश्च युद्धं जनको रोगान्वितो भवति ॥४॥
छिद्रपतौ तनयस्थे क्रूरे सुतविरहितः शुभे शुभः ।
जातोऽपि नैव जीवति जीवेदथ कितवकर्मरतः ॥५॥
छिद्रेशे रिपुसंगते दिनकरे भूभृद्विरोधी गुरौ
त्वङ्गे सीदति दृष्टिरोगकलितः शुक्रे स रोगी विधौ ।
भौमे कोपयुतो बुधे हि भयभृत्तुण्डार्तिभूतः शनौ
कष्टं चैव विधाति तत्र शशिभृत्सौम्येक्षिते नैव किम् ॥६॥
मृत्युपतौ सप्तमगे दुरुदररुक्कुशीलवल्लभो दुष्टः ।
क्रूरे भार्याद्वेषी कलत्रदोषान्मृतिं लभते ॥७॥
निधनपतौ निधनगते व्यवसायी व्याधिवर्जितो नीरुक् ।
कितवकलाकलितवपुः कितवकुले जायते विदितः ॥८॥
मृतिनाथे धर्मस्थे निःसंगी जीवघातकः पापी ।
निर्बन्धुर्निः स्नेही पूज्यो विमुखे मुखे व्यङ्गः ॥९॥
कर्मगते निधनेशे नृपकर्मा नीचकर्मनिरतश्च ।
अलसः क्रूरे खचरे तनयो वा न जीवति माता ॥१०॥
लाभस्थे मृत्युपतौ बाल्ये दुःखी सुखी भवति पश्चात् ।
दीर्घायुः सौम्यखगे पापेऽल्पायुर्नरो भवति ॥११॥
व्ययसंस्थितेऽष्टमेशे क्रूरवाक् तस्करः शठो निर्घृणः ।
आत्मगतिर्व्यङ्ग्वपुर्मृतस्तु काकादिभिर्भक्ष्यः ॥१२॥