षष्ठेशो लग्नगतो नीरुक्सबलः कुटुम्बकष्टकरः ।
बहुपक्षो रिपुहन्ता भवति नरः स्वैरवचनधनः ॥१॥
शत्रुपतौ द्रविणस्थे दुष्टश्चतुरो हि संग्रहपरेष्टः ।
स्थानप्रवरो विदितो व्याधिततनुः सुत्दृद्वित्तघ्नः ॥२॥
षष्ठपतिः सहजस्थः कुरुते सलोककष्टकरः ।
निजजनकमारणं कष्टं संग्रामतस्तस्य ॥३॥
षष्ठाधिपतिस्तुर्ये पितृतनयौ वैरिणौ मिथः कुरुते ।
सरुक् पिता सोऽथ सुतो लक्ष्मीं लभते नरः सुचिरम् ॥४॥
रिपुभवनपतौ सुतगे पितृतनयौ वैरिणौ मृतिः सुततः ।
क्रूरे शुभे च निर्धनः पदवी दुष्टश्च तत्कपटी ॥५॥
रिपुभवने रिपुसंस्थे नीरुग्वैरी सुखी कृपणः ।
नहि जन्मतोऽपि सीदति स्थानकुवासी च भवति नरः ॥६॥
अहितपतौ सप्तमगे क्रूरे भार्या विरोधनी चण्डी ।
संतापकरी त्वथ सौम्यैर्वन्ध्या वा गर्भनाशपरा ॥७॥
शनेर्ग्रहणिकारुजो विषधराद्धरानन्दनाद-
बुधाच्च विषदोषतः सपदि मृत्युरेणाङ्कतः ।
रवेर्मृगपतेर्वधात्प्रकटमष्टमात्षष्ठपाद्-
गुरोरपि च दुष्टधीर्नयनदोषवाञ्छुक्रतः ॥८॥
शत्रुपतिर्यदि नवमः क्रूरः खचरस्तदा भवेत् खञ्जः ।
बन्धुविरोधी शास्त्रं न मन्यते याचकः पुरुषः ॥९॥
अरिपे दशमगृहस्थे क्रूरे मातरि रिपुस्तदा दुष्टः ।
धर्मसुतपालनमतिर्मातुर्दोषी भवेद्वैरी ॥१०॥
वैरिपतौ लाभगते क्रूरे मरणं विपक्षतो भवति ।
वैरितस्करकृतहानिः स्याच्चतुष्पदाल्लाभवान्मनुजः ॥११॥
षष्ठपतौ द्वादशगे चतुष्पदाद्द्रव्यहानिकरः ।
गमनागमनं लक्ष्मीहा देवपरो भवति ॥१२॥