भावचक्रानयनम् ।
ज्ञेयोऽत्र प्रथमं हि जन्मसमयः कार्यादियन्त्रैः स्फुटं
तत्कालप्रभवा विलग्नसहिताः कार्यास्ततश्च ग्रहाः ।
सिद्धान्तोक्तपरिस्फुटोपकरणैः स्वैर्वा सकृत्कर्मणा
भावाः खेटदृशो बलानि च ततस्तेषां विचिन्त्यानि षट् ॥१॥
वदन्ति भावैक्यदलं हि सन्धिस्तत्रास्थितं स्यादबलो ग्रहेन्द्रः ।
ऊनेषु सन्धेर्गतभावजातामागामिजं चाप्यधिकं करोति ॥२॥
भावांशतुल्यं खलु वर्तमानो भावो हि संपूर्णफलं विधत्ते ।
भावोनके चाप्यधिके च खेटे त्रिराशिकेनात्र फलं प्रकल्प्यम् ॥३॥
भावप्रवृत्ता हि फलप्रवृत्तिः पूर्ण फलं भावसमांशकेषु ।
हासःक्रमाद्भावविरामकाले फलस्य नाशः कथितो मुनीन्द्रैः ॥४॥
जन्मप्रयाणव्रतबन्धचौलनृपाभिषेकादिकरग्रहेषु ।
एवं हि भावाः परिकल्पनीयास्तैरेव योगोत्थफलानि यस्मात् ५ ॥
भावकरणम् ।
तत्रादौ स्वदेशोदयज्ञानम् -
लङ्कोदया नागतुरङ्गदस्त्रा गोङ्काऽश्विनो रामरदा विनाड्यः ।
क्रमोत्क्रमस्थाश्चरखण्डकैः स्वैः क्रमोत्क्रमस्थाश्च विहीनयुक्ताः ॥६॥
लग्नसाधनम् ।
तत्कालार्कः सायनः स्वोदयघ्नो भोग्यांशाः खत्र्युद्धृता भोग्यकालः ।
एवं यातांशैर्भवेद्यातकालो भोग्यः शोध्योऽभीष्टनाडीपलेभ्यः ॥७॥
तदनु जहीहि गृहोदयांश्च शेषं गगनगुणघ्नमशुद्धदृल्लवाद्यम् ।
सहितमजादिगृहैरशुद्धपूर्वैर्भवति विलग्नमदोयनांशहीनम् ॥८॥
भोग्याल्पकालात्खत्रिघ्नात्स्वोदयाप्तलवादियुक् ।
रविरेव भवेल्लग्नं सषडभार्कान्निशातनुः ॥९॥
दशमसाधनार्थ नतानयनम् ।
मध्याह्ने चार्धरात्रे वा स्वेष्टकालो यदा भवेत् ।
तदा तात्कालिकः सूर्यो भवेल्लग्नं खतुर्यकम् ॥१०॥
रात्रिशेषगते वापि दिनार्द्ध भयुतं दिनम् ।
दिनार्द्ध दिनजातेन तत्पूर्वमपरं परम् ॥११॥
अर्द्धरात्रिपरं यावद्दिनमध्यान्नतं भवेत् ।
रवेः पूर्वकपालं च तदूर्ध्व पश्चिमं नतम् ॥१२॥
प्राग्लङ्कोदयतः साध्या उक्ताश्च घटिका रवेः ।
प्राक्कपालमृणं कुर्याद्धनमन्यकपालयोः ॥१३॥
धनादिभावसाधनम् ।
लग्नं चतुर्थात्संशोध्य शेषं षडभिर्विभाजितम् ।
राश्यादि योजयेल्लग्ने सन्धिः स्याल्लग्नवित्तयोः ॥१४॥
सन्धिः षडंशसंयुक्तो धनभावो भवेत्स्फुटः ।
धनभावः षडंशाढ्यः सन्धिर्धनतृतीययोः ॥१५॥
षडंशसंयुतः सन्धिस्तृतीयो भाव उच्यते ।
षडंशाढ्यस्तृतीयः स्यात्सन्धिर्भ्रा ( र्मा ) तृचतुर्थयोः ॥१६॥
तृतीयसन्धिरेकाढ्यस्तर्यःसन्धिर्भवेदिह ।
द्वयाढयस्तृतीयभावोऽपि पुत्रभावो भवेत्स्फुटः ॥१७॥
त्र्याढ्यो द्वितीयसन्धिः स्यात्सन्धिः पञ्चमभावजः ।
धनभावो वेदयुतो रिपुभावः प्रजायते ॥१८॥
लग्नसन्धिः पञ्चयुतः सन्धिः स्याद्रिपुभावजः ।
लग्नाद्याः सन्धिसहिता भावाः षड्राशिसंयुताः ।
सप्तमाद्या भवन्तीह भावाः सर्वे ससन्धयः ॥१९॥
भावकुंडली ।
अथ तन्वादयो भावाः ससन्धयः स्युः ।
विश्वाप्रतिविश्वाकरणम् ।
सन्धीकृताधिकाः खेटा ग्रहैश्च नखताडिताः ।
भावसंध्यन्तरेणाप्तं तत्र विंशोपकाः फलम् ॥२०॥