विष्कम्भजातो मनुजो रुपवान्भाग्यवान्भवेत् ।
नानालङ्कारसंपूर्णो महाबुद्धिर्विशारदः ॥१॥
प्रीतियोगे समुत्पन्नो योषितां वल्लभो भवेत् ।
तत्त्वज्ञश्च महोत्साही स्वार्थे नित्यं कृतोद्यमः ॥२॥
आयुष्मान्नामयोगे च जातो मानी धनी कविः ।
दीर्घायुः सत्त्वसंपन्नो युद्धे चाप्यपराजितः ॥३॥
सौभाग्ये च समुत्पन्नो राजमंत्री स जायते ।
निपुणः सर्वकार्येषु वनितानां च वल्लभः ॥४॥
शोभने शोभनो बालो बहुपुत्रकलत्रवान् ।
आतुरः सर्वकार्येषु युद्धभूमौ सदोत्सुकः ॥५॥
अतिगण्डे च यो जातो मातृहन्ता भवेच्च सः ।
गण्डान्तेषु च जातस्तु कुलहन्ता प्रकीर्तितः ॥६॥
सुकर्मानामयोगे तु सुकर्मा जायते नरः ।
सर्वैः प्रीतः सुशीलश्च रागी भोगी गुणाधिकः ॥७॥
धृतिमान् धृतियोगी च कीर्तिपुष्टिधनान्वितः ।
भाग्यवान्सुखसंपन्नो विद्यावान्गुणवान् भवेत् ॥८॥
शूले शूलव्यथायुक्तो धार्मिकः शास्त्रपारगः ।
विद्यार्थकुशलो यज्वा जायते मनुजः सदा ॥९॥
गण्डे गण्डव्यथायुक्तो बहुक्लेशो महाशिराः ।
हस्वकायो महाशूरो बहुभोगी दृढव्रतः ॥१०॥
वृद्धियोगे सुरुपश्च बहुपुत्रकलत्रवान् ।
धनवानपि भोक्ता च सत्त्ववानपि जायते ॥११॥
ध्रुवयोगे च दीर्घायुः सर्वेषां प्रियदर्शनः ।
स्थिरकर्माऽतिशक्तश्च ध्रुवबुद्धिश्च जायते ॥१२॥
व्याघातयोगजातश्च सर्वज्ञः सर्वपूजितः ।
सर्वकर्मकरो लोके व्याख्यातः सर्वकर्मसु ॥१३॥
हर्षणे जायते लोके महाभाग्यो नृपप्रियः ।
धृष्टः सदा धनैर्युक्तो विद्याशास्त्रविशारदः ॥१४॥
वज्रयोगे वज्रमुष्टिः सर्वविद्यास्त्रपारगः ।
धनधान्यसमायुक्तस्तत्त्वज्ञो बहुविक्रमः ॥१५॥
सिद्धियोगे समुत्पन्नः सर्वसिद्धियुतो भवेत् ।
दाता भोक्त सुखी कान्तः शोकी रोगी च मानवः ॥१६॥
व्यतीपाते नरो जातो महाकष्टेन जीवति ।
जीवेत्स्याद्भाग्ययोगेन स भवेदुत्तमो नरः ॥१७॥
वरीयान्नामयोगे च बलिष्ठो जायते नरः ।
शिल्पशास्त्रकलाभिज्ञो गीतनृत्यादिकोविदः ॥१८॥
परिघे च नरो जातः स्वकुलोन्नतिकारकः ।
शास्त्रज्ञः सुकविर्वाग्ग्मी दाता भोक्ता प्रियंवदः ॥१९॥
शिवयोगे नरो जातः सर्वकल्याणभाजनः ।
महादेवसमो लोके सदा बुद्धियुतो भवेत् ॥२०॥
सिद्धियोगे सिद्धिदाता मंत्रसिद्धिप्रवर्तकः ।
दिव्यनारीसमेतश्च सर्वसम्पद्युतो भवेत् ॥२१॥
साध्ये मानसिका सिद्धिर्यशोऽशेषसुखागमः ।
दीर्घसूत्रः प्रसिद्धश्च जायते सर्वसंमतः ॥२२॥
शुभे शुभशतैर्युक्तो धनवानपि जायते ।
विज्ञानज्ञानसंपन्नो दाता ब्राह्मणपूजकः ॥२३॥
शुक्ले सर्वकलायुक्तः सर्वार्थज्ञानवान्भवेत् ।
कविः प्रतापी शूरश्च धनी सर्वजनप्रियः ॥२४॥
ब्रह्मयोगे महाविद्वान् वेदशास्त्रपरायणः ।
ब्रह्मज्ञानरतो नित्यं सर्वकार्येषु कोविदः ॥२५॥
ऐन्द्रे भूपकुले जातो राजा भवति निश्चयः ।
अल्पायुस्तु सुखी भोगी गुणवानपि जायते ॥२६॥
वैधृतो जायते यस्तु निरुत्साही बुभुक्षितः ।
कुर्वाणोऽपि जनैः प्रीतिं प्रयात्यप्रियतां नरः ॥२७॥