चैत्रे च दृष्टिभाजः स्यात्साहङ्कारः शुभाकरः ।
रक्तेक्षणः सरोषश्च स्त्रीलोलः स भवेत्सदा ॥१॥
भोगी धनी सुचितश्च सक्रोधश्च सुलोचनः ।
सुरुपो वल्लभः स्त्रीणां माधवे जायते नरः ॥२॥
परदेशरतश्चैव शुभचित्तो धनान्वितः ।
दीर्घायुश्च सुबुद्धिश्च ज्येष्ठे सुष्ठु धनी भवेत् ॥३॥
पुत्रपौत्रान्वितो धर्मी वित्तनाशेन पीडितः ।
सुवर्णश्चाल्पसुखितो ह्याषाढे च भवेन्नरः ॥४॥
सुखदुःखे तथा हानौ लाभे च समचित्तकः ।
स्थूलदेहः सुरुपश्च श्रावणे जायते नरः ॥५॥
नित्यप्रमोदी जल्पाकः पुत्रयुक्तः सुखी भवेत् ।
मृदुभाषी सुशीलश्च भाद्रजातो भवेन्नरः ॥६॥
सुरुपश्च सुखैर्युक्तः काव्यकर्ता परः शुचिः ।
गुणवान् धनवान् कामी ह्याश्विने जायते नरः ॥७॥
सुधनी कामबुद्धिश्व दुरात्मा क्रयविक्रयी ।
पापीयान् दुष्टचित्तश्व कार्तिके जायते नरः ॥८॥
मृदुभाषी धनी धर्मी बहुमित्रः पराक्रमी ।
परोपकारी जातश्च मार्गशीर्षे भवेन्नरः ॥९॥
शूर उग्रप्रतापी च पितृदेवविवर्जितः ।
ऐश्वर्यजन्मकारी च पौषे मासे नरो भवेत् ॥१०॥
मतिमान् धनवांश्चैव शूरो निष्ठुरभाषकः ।
कामुकश्च रणे धीरो माघजातो भवेन्नरः ॥११॥
शुक्लः परोपकारी च धनविद्यासुखान्वितः ।
विदेशे भ्रमते नित्यं फाल्गुने जायते नरः ॥१२॥
विषयहीनमतिः सुचरित्रदृग् विविधतीर्थकरश्च निरामयः ।
सकलवल्लभ आत्महिते रतः खलु मलिम्लुचमासभवो नरः ॥१३॥