पहा हो कसा हा कारागीर !
थरारुनी तनू झरे नयनीं नीर. ध्रु०
कतरण ही पानिंपानिं रम्य झालरीपरी
तरी करांतरीं कुठे नाहिं कातरी ! १
फुलाफुलामधें कशा छटा सुरम्य रंगल्या !
इंद्रचाप रंग हे ! करिं न कुंचल्या. २
मख्माली फुलपांखरुं सुबक हें पहा कुणी,
बुट्या पहा परांवरी, करिं न लेखनी. ३
अगाध नीलिमा वरी, रम्य गोल त्यावरी
सुनेरी रुपेरी हे खीलहि न करीं. ४
काळी ही चंद्रकळा रात्र ल्यालि; तीवरी
कशीदा रुपेरी हा, सुइ कुठे करीं ? ५
गझनीचा पट भरजरि भानुच्या गवाक्षिं तो,
अधांतरीं अयंत्रची किति चकाकतो ! ६
लवव मान मानवा, वृथाभिमान सांडुनी;
अनंत रम्यता पहा ! लाज रे मनीं. ७