गुरुवारचें दत्ताचें पद
नरा दत्तगुरु हें परब्रह्म आहे । होई जागृत उगा फससि मोहें ॥ध्रु०॥
दत्तगुरु, मन्मनीं, दत्तगुरु लोचनीं । दत्तगुरु यद्वचनिं भरुनि कानीं ॥
दत्तगुरु बाहेरी, दत्तगुरु अंतरीं, दत्त सर्वांतरीं भरुनि राहे ॥१॥
ब्रह्म हा दत्तगुरु, विष्णु हा दत्तगुरु । रुद्र हा दत्तगुरु सत्य आहे ॥
दत्तगुरु तारक, दत्तगुरु कारक । शक्तिधर लोकसाक्षीच आहे ॥२॥
दत्तगुरु वांचुनी किमपि नाहीं जनीं । दत्तगुरु वांचुनी सुरहि नोहे ॥
दत्तगुरु वांचुनी काय फळ वांचुनी । जाय फळ सोडुनी भोगिता हे ॥३॥
माय फळ पाजिते, काय फळ होय तें । जाय फळ पुण्य तें भोग नासे ॥
मोह फळ दे त्यजुनि, नाहिं फळ पाहुनी । म्हणुनि तूं दत्तगुरुपाद पाहें ॥४॥
भोग खोटा नको, यागताठा नको । योगताठा नको धरुं विमोहें ॥
दत्तगुरु वांचुनी चित्त न धरीं जनीं । दत्तगुरु घे मनीं भरुनि स्नेहें ॥५॥
या युगीं साधनें वाउगीं गुरुविणें । ना उगीं तूं शिणें शास्त्रमोहें ॥
दत्तगुरु देव हा, दत्तगुरु तारि हा । स्वातुभवें वासुदेवचि वदे हें ॥६॥
गुरुवारचा श्रीदत्ताचा अभंग
गणेश गकार हुताश रकार रकार । लक्ष्मीश उकार गुरुदत्ता ॥१॥
अविद्या गुकार तन्नाशक रुकार । गुरुदत्त परपारदाता ॥२॥
गुरुदत्त माता, गुरुदत्त पिता । तोचि भयहर्ता त्राता माझा ॥३॥
गुरुपादपाथ तेंचि माझें तीर्थ । गुरुदेव समर्थ स्वार्थ दाता ॥४॥
गुरुदत्तनाम तेंचि पुण्यधाम । जें घेतां कुकर्म होम करी ॥५॥
गुरुदत्तसेवा परिहरी भवा । संसाराब्धिनावा भावार्थिया ॥६॥
वासुदेव म्हणें येणें कोण शिणे । गुरुविणें जिणें भेणें तेंचि ॥७॥
भजन
दत्त गुरो जय दत्त गुरो । दत्त गुरो जय दत्त गुरो ॥