वसंत - पद प्रसन्न फुलल्या फुलां...

पद
प्रसन्न फुलल्या फुलांसंगतीं मूकबोल बोलूं ।
फुलांसम अंतरंग उमलूं ॥
मंदमंद वार्‍याच्या झुळुकांसंगें आंदोलूं ।
वायुचा झोंपाळा झोलूं ॥
झुळुझुळु वाहे झरा त्यासवें ताल धरुन चालूं ।
झर्‍याचा सुस्वर रव झेलूं ॥
कोमल - चंचल - लतापल्लवीं आनंदें डोलूं ।
पल्लवांसंगतीं हेळूं ॥
निरभ्र निश्चल नभोवितानीं दृश्यसार तोलूं ।
भवाचें गूढ कुलुप खोलूं ॥
खळबळण्यार्‍या लाटांसह या मनोवृत्ति घोळूं ।
जिवींच्या लाटा कल्लोळूं ।
बागडती नाचती वांसरें त्यांसंगें मिसळूं
मानवी जडतेला चाळूं ॥
रुचिर बालकें हंसती खुलती चला त्यांत खेळूं ।
त्यांसवें चैतन्यीं लोळूं ॥
खेळाया जाऊं । वसंतीं वसंतसम पोहूं ॥१॥