॥ अथानूपजातिलक्षणं तद्रुणाश्च ॥

कूलेचराः प्लवाश्चापि कोशस्थाः पादिनस्तथा ।
मत्स्या एतेऽत्र विख्याताः पञ्चधानूपजातयः ॥१॥
महिषागण्डवाराहाश्चमरीवारणादयः ।
एते कूलेचराः प्रोक्ता यस्मात्कूले चरन्त्यपाम्‌ ॥२॥
[ हंससारसबकबृहद्बकक्रौञ्चादयः प्लवसंज्ञकाः ।
शुक्तिशङ्खशम्बूकादयः कोशस्थाः ।
कूर्मनक्रघण्टिकाशिशुमारकर्कटादयः पादिनः ] रोहिताद्यास्तु ये जीवास्ते मत्स्याः परिकीर्तिताः ।
इत्यनूपजाः पञ्च ॥