शक्तियशो नाम

गोमुखेनेति कथितं श्रुत्वा वत्सेश्वरात्मजः ।
प्रभाते निजमुद्यानं ययौ विरहनिःसहः ॥६४२॥
ततो विद्याधराधीशः समेत्य प्रमदाकुलः ।
तां सुतां शक्तियशसं ददौ तस्मै सुलोचनाम् ॥६४३॥
अथ दिव्योचितोत्साहविपुलोत्सवशालिनीम् ।
तया नरेन्द्रपुत्रस्य विवाहश्रीरवर्तत ॥६४४॥
परिणीयेन्दुवदनां प्रहृष्टः पितुराज्ञया ।
विललास स्मरस्मेरो विलासोपवनेषु सः ॥६४५॥
विद्याधरीप्रणयिनं सुतमाकलय्य
वत्सेश्वरः किमपि हर्षसुधार्द्रचेताः ।
देवीसखस्त्रिनयनार्चनकल्पवृक्ष -
सूतेः फलस्य कुसुमोद्गतिमभ्यमंस्त ॥६४६॥

इति क्षेमेन्द्रविरचितायां बृहत्कथामञ्जर्यां शक्तियशो नाम षोडशो लम्बकः ।