गणेश आघाव - विठोबा, उन्हानं करपलंय शे...

विठोबा,
उन्हानं करपलंय शेत
पायांना पडल्यात भेगा
रक्ताळलयही कुठं कुठं
अन्
या ग्लोबल वर्तमानात
चेंजेस झाले आहेत मातीत !
स्वीकारत नाही ती
कुठलंच रासायनिक खात किंवा बी

पूर्वी कसा बांधावरच
घट्ट उभा असायचास तू
सर्‍या - वरंबे
ओढलेल्या रानात
बाप तिफणीवर करायचा पेरणी
अन्
तरारून यायची पिकं वर

आताशा
मातीपरीक्षण करूनदेखील
हाती लागतच नाही
हवा तसा रिझल्ट !

विठोबा...
सगळीकडंच सुरू आहेत
शेतकर्‍यांच्या अंतहीन हाल - अपेष्टा
बेतलंय त्यांच्या जिवावरच
रानभर...मनभर

कुठं आहेस तू... ?