नीलेश कवडे - काय आहे नेमके हृदयात सूर्...

काय आहे नेमके हृदयात सूर्याच्या ?
दुःख जळते कोणते गर्भात सूर्याच्या ?

सारख्या मारून सूर्याभोवती फेर्‍या
घालतो का भर शनी दुःखात सूर्याच्या ?

उंच धांडा चालता शेतात ज्वारीचा
भूक जळते का तिथे पोटात सूर्याच्या ?

तह सलोख्याचाच ग्रह - तार्‍यांमधे होतो...
रात्र चंद्राला, दिवस हिश्शात सूर्याच्या !

बंड एका वेदनेचे अंतरी झाले...
जन्मले मग विश्व हे स्फोटात सूर्याच्या !

दुःख सूर्यासारखे हृदयामधे जळते -
- बसते ऐटीत दरबारात सूर्याच्या !

वेदनेचे तेज हे की आणखी काही... ?
वलय चंद्राला नवे ग्रहणात सूर्याच्या... !

घेतला मग पेट विझलेल्या मशालींनी
पाहिल्यावर काजवे सैन्यात सूर्याच्या !

ओढुनी धरती उन्हाचा पदर डोक्यावर
नाहते ती केशरी रंगात सूर्याच्या... !