मेघना वाहोकार - अजून पुरतं उजाडलेलंही नसत...

अजून पुरतं उजाडलेलंही नसतं.
चहा घेण्याआधीच हाताला चटका गॅस स्टोव्हचा
आणि देह व्यापून नुसती ठसठस...

कामवालीचा मोबाइल नखर्‍यात :
“ आज मी येणार नाही जा कामावर ”
तिकडं उघडावाघड भांड्यांचा ढीग...
रात्रभर पाण्यात गुदमरलेले ओले कपडे...
आणि घर पारोसं...ताटकळलेलं...

पोरांचे मित्र हॉलभरून चेस खेळत...
त्यांचं घरभर हसणं - खिदळणं, गावगप्पा...
आणि खाण्यासाठी हट्ट निरनिराळे...

गावावरून फ़ोन घरातल्यांचा :
“ घराचं बांधकाम रखडलंय...पैसे पाठवा...”
परवाच भरलेली असते कॉलेजची फ़ी मुलांची

होतं माझं गरगरतं पिवळं पान वावटळीतलं

न वाचलेले रविवारचे पेपर हसत असतात
दात विचकून आडव्यातिडव्या संसारावर
हातातली काचेची वरणी ठस्कन् फ़रशीवर
काही कळण्याआधीच
जात्यापात्यात भरडला जातो सुट्टीचा रविवार !