लतिका - मुरडितसा नाकें आज पाहोनी ...

मुरडितसा नाकें आज पाहोनी या लतिकेला,
जाणाकीं निश्चय परि ही भूषवील उद्यानाला.
हे तीव्र विषाचे वारे, मधुपूरित ही करील;
‘शुष्क काष्ट’ म्हणतां तीच पसरेल दिगंतीं वेल.

शिशिराच्या शीतल भारी
लहरीवर येती लहरी,
ही झाली दीन विचारी,
इष्ट काळ हा न तियेला - भूषवील उद्यानाला.

==

येईल वसंत सुखाचा, ही पुलकित होइल बाला,
नंदनवना आणिल खालीं, भूमीला भेटविण्याला,
सुरकिन्नर येतिल तेव्हां. मग हिजला आळवण्याला -

तोंवरि हो ! घ्या हांसोनी,
भ्रुकुटींच्या विषमयबाणीं
कीं दुर्धर दुर्वचनांनीं -

घ्या ताडुनि या बालेला - भूषवील उद्यानाला.