गज्जलाञ्जलि - निमालीच का माया ? कशाला द...

निमालीच का माया ? कशाला दुरी जाशी ?
पुन्हा स्नेह सम्पादूं कसा आणि कोणाशी ?

तुझ्यावीण या रातीं मला कोण साङगाती ?
मुखेन्दूच तूजा हा जगीं या तमोनाशी ?

तुझ्या सङगतीं गेली सुखाचीं किती वर्षें !
स्मरूनीच राहूं का गतप्रीतिच्या राशी ?

तुझ्या सङगतीं जीं जीं मला लाभलीं श्रेयें
न तीं खोल पाताळीं, न तीं ऊन्च आकाशीं,

कृपेची तुझी द्दष्टी करी जी सुधावृष्टी
वसे ती न वैकुण्ठीं, असे ती न कैलासीं.

तुझ्या प्रीतिची ज्वाला करी शुद्ध जीवाला,
नको जान्हवी - रेवा, नको द्वारका - काशी.

नको जाऊं टाकोनी, नसे या जिवा कोणी,
अता भार:का झालों ? तुवां गोविलें पाशीं.

बरें, जा हवें तेथ, तुला दैवहें नेतें,
परि देवि, जातां जा मला देऊनी आशी,

६ एप्रिल १९२२