(३-१-१९३६)
१
वेड लावी ती जिवाला बालिका,
उरि शलाका टोंचते ती, तारका ।
अप्सरा ती गोड गाणीं
गात नेई मज विमानीं,
स्वर्गिचा लागे रुपेरी उंबरा,
तोंच मारी मस्तकी ती, ठोकरा ।
२
जगाचे बंध कोणाला ? जगाचा बांधला त्याला ।
मला जो थांबवी ऐसा, जगीं निर्बंध ये कैसा ?
जगाने देह हा केला, जगाने वाहिले त्याला,
हाणा मारा, खुडा तोडा, परी आता मला सोडा !
न कीर्तीला, न प्रेमाला, न सौख्याला, न विलासाला,
न विघ्नाला, न मृत्यूला, मला ये आडवायाला
पुरे संबंध प्रेमाचा, नको हा खेळ प्रेमाचा,
मिळे ज्या प्रीतीचा त्याला, विषारी तो असा पेला ।
३
जीव प्रणय़ भुलवी ! कां हा ?
मनाला सहज फसवित कां या । माया वाया,
तृषित जसे हरिण फसे । जल भासें,
मूढ जन तेवि !
जनिं पतंग कां । भुलतं दीपका ?
घाली झडप किरणांना । वाटते भय न त्या केवि ?