वारांची गीते - विडा

॥ विडा घ्यावो रामराया । महाराज राजया ॥धृ०॥ रत्नजडित पानदान । आली जानकी घेवोन । विडा देती करोनियां । दीनबंधू रामराया । विडा घ्या० ॥१॥
सुगंध रंगेरी पानें । मुक्त मोतीयाचा चूना । सुपारी कातगोळ्या । भक्तिभावें मेळविल्या । विडा घ्या० ॥२॥
जायपत्री जायफळ । विडा जाहला सूफळ । सीता रामालागीं देत । केशर-कस्तुरीयुक्त । विडा घ्या० ॥३॥
सीता राम विडा घेतां । ऐक्यभावें एकात्मता । रंगली ऐक्यरंगीं । रामदास पायांलागीं । विडा घ्या० ॥४॥