हे नक्षत्रचरितामृताचे पेय । शीतल जान्हवीचे तोय ।
नित्य सेविता अभय । दे भवरोगापासून ॥१॥
ते सावकाश सेवावे । हृदयी भरून उरवावे ।
मनन , चिंतन करावे । भक्तिभावे ॥२॥
हे तीव्र भक्तिरसायन । पापक्षालनाचे साधन ।
भवरोगाचे उच्चटन । करेल त्वरीत ॥३॥
जळतील पापे जन्मांतरीची । उघडतील द्वारे मुक्तिची ।
विवेक आणि परमार्थाची । जाणीव होईल ॥४॥
सोमवारी , शुद्ध एकादशी । आषाढ , श्रावण अश्विन मासी ।
दशमी तिथे विशेषी । करावे पारायण ॥५॥
दुःख , दारिद्र्य , ताप , संताप । व्यसने , दुराचरणाचा व्याप ।
शांत होतील सारे कोप । करता पारायण ॥६॥
दुसर्याचे भले चिंतावे । स्वजन आपले धरावे ।
बहुजनासी सख्य व्हावे । ऐसी मति होईल ॥७॥
अन्याय कोठे साहो नये । प्रतिकाराविण राहो नये ।
आपण न्याय सोडो नये । ऐसी मति होईल ॥८॥
नित्य पूर्वजांसी स्मरावे । वृद्ध , वडिला रक्षावे ।
लहानाचे भले व्हावे । ऐसी मति होईल ॥९॥
या चरित्राचे नित्यवाचन । दुरिताचे करील हरण ।
सुखी ठेवो नारायण । ऐसी मति होईल ॥१०॥
ही नक्षत्रचरित्राची पूर्णाहूति । सिधराजे दिली मति ।
मातृपदी ठेवतो कृति । अत्यादरे वसंत ॥११॥
आता अवभृत स्नान । करोन चित्ती समाधान ।
काव्यमख संपन्न केला असे ॥१२॥