आतां मुख्य देवालय । परम पवित्र शिवालय ।
श्वशुर ज्याचा हिमालय । नगाधिपती ॥१॥
हे सिद्धपुरुषांचे समाधिस्थान । परम पवित्र गहन ।
मोक्ष मुक्तिचे साधन । भाविकांस ॥२॥
अनादि काळी प्रख्यात । श्रीकृष्णेच्या डोहात ।
भिल्लग्रामे होता स्थित मठ सिद्धाचा ॥३॥
श्रीभुवनेश्वरी वरदायिनी । सिद्धांचे येवोन स्वप्नी ।
म्हणे हे स्थान सोडोनी । कवठ्यास जावे ॥४॥
तेथेच करावा वास । दीन भक्त तारण्यास ।
भूतबाधादि करी निरास । निरामय क्षेत्र ॥५॥
त्या कारणी वेगीं आले । मठ स्थापोनी राहिले ।
पुढे देवालय बांधविले । ते हे शिवालय ॥६॥
या मंदिराचे वेगळेपण । सृष्टि धर्ता -हर्त्याचे विलक्षण ।
हरिहराचे मिलन जाण । येथे झाले ॥७॥
श्रीयंत्र नक्षत्रसाधन बळे । मंदिराची उभारिली स्थळे ।
सौंदर्य कुशल कोमल मुळे । गर्भगृहे ॥८॥
उजवे हाती श्रीगजानन । डावे हाती श्रीहनुमान ।
पुढे नांदि भक्त महान । श्रीचरणी दक्ष ॥९॥
कूर्म बसले सांवरून । अवयव सारे एकवटून ।
दृष्टि देवाकडे लावून । स्थितप्रज्ञ ॥१०॥
माथा गणेशपट्टी आगळी । सूर्यचंद्र धाटी वेगळी ।
कलाकुसरीची नव्हाळी । प्रवेशद्वारी ॥११॥
येथे उभे राहून । भक्त करती मुखदर्शन ।
नंदिच्याशृंगा हात लावून ।ल्क्षताती ॥१२॥
गर्भगृह पहिले ढोलांचे । कुळकुळीत पाषाणाचे ।
नाना कलाकुसरीचे । खांब कमानी ॥१३॥
कमळे , अश्वमुखे , तळखडे । फरसबंदीचे रूप तगडे ।
घडीव चिर्‍यांनी लगडे । रचिले शिशांत ॥१४॥
शिरता या गाभार्‍यात । दक्षिणेस एका कमानीत ।
शिवलिंग केले स्थापित । द्वार सुरुंगाचे ॥१५॥
येथे प्रवेश केला असता । शामिवृक्षाकडे जातो रस्ता ।
पुढे अंधार आहे नुसता । आणि पाणी ॥१६॥
गाभार्‍याचे दक्षिणद्वार । विंझण वाहे निरंतर ।
द्वारापाठी मोठा अडसर । रक्षणकर्ता ॥१७॥
अगणित रुपये चांदीचे । मध्ये नाणे सुवर्णाचे ।
देणे नवसासायासाचे । फरसबंदी ठोकलेले ॥१८॥
तेणे पालटले रूप । पाषाणाचे बदले स्वरूप ।
भूमि मढवली रुप्याने खूप । ऐसे दिसे ॥१९॥
या गाभार्‍यात थंड वात । आणि श्रींचे शेजघर शांत ।
मंचकावरी विसावे निवांत । प्रभू सिद्धराज ॥२०॥
येथे गुरवाचा अधिकार । शिवालयाचा प्रपंच थोर ।
देणे -घेणे , साष्टांग नमस्कार । येथून करा ॥२१॥
जीवन म्हणजे एक श्वास । उश्वासाचा नाही विश्वास ।
असावे मरणाचे खास । स्मरण पदोपदी ॥२२॥
परी व्यवहार प्रबळ दारूण । प्रपंच परमार्थाचे कारण ।
विवेक कसला स्वार्थ प्रमाण । युद्धे करती ॥२३॥
ऐसा मोठा योद्धा एक । बलदंड करी भालाफेक ।
ज्ञाता शस्त्रास्त्रांचा अनेक । पटवर्धन कुळी ॥२४॥
परशुरामभाऊ ख्यात । ज्येष्ठ योद्धा विख्यात ।
सिद्धराजाचा परम भक्त । युद्ध करण्या निघाला ॥२५॥
कवचकुंडलांहूनी विशेष । प्रभू ईश्वराचे आशीश ।
रक्षण युस्शप्रसंगी निःशेष । करितात ॥२६॥
प्रभुदर्शनाची जाणून मात । परशुराम करी प्रणिपात ।
बिडेश प्रार्थी सद्‍भक्त । यश देई ॥२७॥
तो कटीची समशेर गळाळी । गाभारी स्वये पशली ।
आयुष्याची सद्दी सरली । हा अपशकुन ॥२८॥
श्रीरंगपट्ट्णाहूनि आता । जिवे येणार नाही परता ।
नीलकंठ महादेव त्राता । बरे येतो ॥२९॥
ती दुधारी खांडा तलवार । वजन मोठे तालेवार ।
राहिली आत निरंतर । या गाभारी ॥३०॥
घंटांचा कोंदे नाद । ढोल करी महाशब्द ।
कलोळ घालितो साद । भक्तांचा बडिवार ॥३१॥
आरत्या , भूपाळ्या , टाळ्या । भक्तांच्या पाहून मंडळ्या ।
भुताखेतांच्या पळती टोळ्या । दशदिशा ॥३२॥
येथे फुले काढती । नवस नाना भक्त बोलती ।
अनन्यभावे येते प्रचिती । रक्षी सिद्धराज ॥३३॥
नक्षत्र भक्षिता झाली माता । हे कमलेशाची सत्ता ।
अनन्य श्रद्धेची मत्ता । नक्षत्रस्वामी ॥३४॥
नाही अंधश्रद्धेचा भाव । तो दुर्जनांचा स्वभाव ।
हा असीम श्रद्धेचा प्रभाव । पूर्ण जाणा ॥३५॥
श्रद्धा असते केवळ श्रद्धा । अंध -डोळसाची बाधा बद्धा ।
साधकासी तारते श्रद्धा । अटळ ॥३६॥
चला आता पुढे जाऊ । तीर्थाचा गाभारा पाहू ।
शब्दसुमनांच्या माळा वाहू । कमलेशाला ॥३७॥
या गर्भगृही उदंड । रुद्रावर्तने चालती अखंड।
पारायणे , वेदघोष प्रचंड । मंत्रजागर , स्त्रोत्रे ॥३८॥
ब्रम्हवृंदाने येथे बसावे । प्रभुसी वेदोच्चारे आळवावे ।
परांचे भले स्मरावे । देवापाशी ॥३९॥
उत्तर भिंतीत पाषाण थोर । पाषाण सारता दूर ।
भुयाराचे भले प्रवेशद्वार । मार्ग प्रशस्त ॥४०॥
खाली सिद्धसमाधिस्थान । परतत्वाचे करण्या चिंतन ।
तप , समाधिस्थान । करा गुप्त जागा ॥४१॥
याचे वरी देवाचा गाभारा । गाठी पडली हरिहरा ।
कमलकांताच्या घरा । पार्वतिपति ॥४२॥
आता आणि पुढे जाऊ । शाळुंकेवरी माथा ठेऊ ।
श्रीसिद्धराजाला आळवू । अनन्यभावे ॥४३॥
हरिनारायणाची येथे वस्ती । सिद्ध -सुगरणांचे सांगाती ।
भक्तपालना कारणे । कपित्थनगरी ॥४४॥
सोळा सिद्धांचा मेरूमणी । जया वर्णिता शिणे वाणी ।
अनन्यभावे जोडे पाणी । रामानुज ॥४५॥
या गर्भगृहाची शोभा । प्रत्यक्ष चंद्रमौलीची आभा ।
दशदिशा फाकते प्रभा । श्रीमुख झळाळे ॥४६॥
तेवती अखंड नंदादिप ।स्वच्छ जल भरले समीप ।
प्राकारी ओतता अमाप । गाभारी सांचते ॥४७॥
पूर्वाभिमूख देवराणा । सोमसूत्र उत्तरेस जाणा ।
कामार आणि वैकंठराणा । अद्वैते नांदती ॥४८॥
शिवालयी तीर्थ अग्राह्य । परी येथे ते ग्राह्य ।
हरिनारायण झाला साह्य । भक्तसंतोषा ॥४९॥
नित्य संकल्पादि करून । षोडशोपचारे करती पूजन ।
आरत्या मंत्रपुष्पांजली म्हणून ।देवालयी ॥५०॥
पूजा पुजार्याचे काम । त्याने ते करावे निष्काम ।
प्रातः सायं उभा कल्पदूम ।रक्षिल निश्चये ॥५१॥
पंचपंच उषःकाली ।काकड आरत्या चंद्रमौली ।
तपन अप -हानकाली । गुरव करती ॥५२॥
प्रदोष समयी मंदवासरी । मंगलस्नान करी श्रीहरि ।
प्रभावळीसह पूजन करी । कमलेशाचे ॥५३॥
महापूजा आणि एकादष्ण्या । लघुरुद्र , महारुद्र पाहण्या ।
सोमवारी अर्चन करण्या । भक्त येती ॥५४॥
आरत्या मंत्रोच्चाराचा कल्लोळ । ढोल , घंटानादाचा गदारोळ ।
गर्जे सिद्धराज भूपाळ । भुते पळयी ॥५५॥
हा सोळा सिद्धांचा स्ग्रणी । मुनिवराआंचा मेरूमणी ।
व्यासे वर्णिला पुराणी । बिराडसिद्ध ॥५६॥
श्रीनक्षत्रस्वामींचे चरित्र अद्‌भूत । मने सज्जनांची होती शांत ।
भक्त आनंदाने परिसोत । चतुर्थोध्याय हा ॥५७॥