ॐ योगीश्र्वरं याज्ञवल्क्यं संपूज्य मुनयोऽब्रुवन् ।
वर्णाश्रमेतराणां नो ब्रुहि धर्मानशेषतः ॥१॥
मिथिलास्थः स योगींन्द्रः क्षणं ध्यात्वाब्रवीन्मुनीन् ।
यस्मिन्देशे मृगः कृष्णस्तस्मिन्धर्मान्निबोधत ॥२॥
पुराणन्यायमीमांसाधर्मशास्त्राङ्गमिश्रिताः ।
वेदाः स्थानानि विद्यानां धर्मस्य च चतुर्दश ॥३॥
मन्वत्रिविष्णुहारीतयाज्ञवल्क्योशनोङ्गिरः ।
यमापस्तम्बसंवर्ताः कात्यायनबृहस्पती ॥४॥
पराशरव्यासशंखलिखिता दक्षगौतमौ ।
शातातपो वसिष्ठश्र्च धर्मशास्त्रप्रयोजकाः ॥५॥
देशे काले उपायेन द्रव्यं श्रद्धासमन्वितम् ।
पात्रे प्रदीयते यत्तत्सकलं धर्मलक्षणम् ॥६॥
श्रुतिः स्मृतिः सदाचारः स्वस्य च प्रियमात्मनः ।
स्म्यक् संकल्पजः कामो धर्ममूलमिदं स्मृतम् ॥७॥
इज्याचारदमाहिंसादानस्वाध्यायकर्मणाम् ।
अयं तु परमो धर्मो यद्योगेनात्मदर्शनम् ॥८॥
चत्वारो वेदधर्मज्ञाः पर्षत्त्रैविद्यमेव वा ।
सा ब्रूते यं स धर्मः स्यादेको वाऽध्यात्मवित्तमः ॥९॥